Karólína er á mála hjá Bayer Leverkusen á láni frá þýska stórveldinu Bayern Munchen. Hún gekk í raðir Bayern frá Breiðabliki 2021 og á að baki 41 A-landsleik fyrir Íslands hönd.
„Ég hef þurft að fórna mjög miklu. Ég væri ekki þar sem ég væri í dag ef ég hefði ekki fært allar þessar fórnir,“ sagði Karólína og var í kjölfarið beðin um að taka dæmi. Þá minnstist hún á það þegar hún missti af glæsilegu brúðkaupi frænda hennar Gylfa Þórs Sigurðssonar og Alexöndru Helgu Ívarsdóttur.
„Þegar ég er valin í fyrstu landsliðsferðina mína missti ég af brúðkaupinu hjá Gylfa og Alexöndru. Ég var í vinnunni á Kópavogsvelli. Ég sat með Áslaugu Mundu og við eitthvað í símanum og sjáum bara að við erum báðar í landsliðshópnum,“ rifjaði Karólína upp en um var að ræða tvo landsleiki við Finnland sumarið 2019.
„Við skildum ekki neitt. Ég sé bara að þetta er akkúrat þegar brúðkaupið er og ég vissi ekki hvort ég ætti að grenja eða hlæja. Ég viðurkenni að það komu alveg smá tár yfir að missa af þessu brúðkaupi en svo þegar maður spilaði þennan leik var mér alveg sama.
Þessi landsliðsferð var ekki á Lake Como heldur í Finnlandi og í fyrsta leiknum spilaði ég núll mínútur. Ég trúði ekki að ég hefði sleppt þessu en í næsta leik fá ég fyrsta landsleikinn minn og þá var manni alveg sama.“
Karólína hefur alltaf verið staðráðin í að ná langt í fótboltanum og kom ekki annað til greina en að fórna öðru til að ná því.
„Ég er enginn djammari, drekk ekki og var ekki mikið á þessum böllum. Ég er mjög heimakær svo ég var mikið heima og vildi kannski bara fara á æfingu í staðinn. Þetta var ekkert mjög erfitt fyrir mig,“ sagði Karólína þegar hún ræddi framhaldsskólaárin.