Gary Lineker sakar blaðamann Daily Star um að skýla sér bak við orð sín á blaðamannafundi með Harry Kane á dögunum.
Enska landsliðið var mikið gagnrýnt eftir síðasta leik á EM í Þýskalandi, jafntefli gegn Dönum. Kom það eftir heldur ósannfærandi sigur á Serbíu í fyrsta leik. Fyrrum landsliðsmaðurinn Lineker hefur verið hvað harðastur í gagnrýninni á liðið og hjólaði í það eftir síðasta leik. Kallaði hann frammistöðuna „ömurlega (e. shit).“
Á blaðamannafundi var Kane spurður út í þessi ummæli hans. Svaraði framherjinn á þann veg að fyrrum landsliðsmenn þyrftu að átta sig á ábyrgð sinni, þeir vita hvernig er að vera í þeirra sporum og að þetta geti sérstaklega haft áhrif á landsliðsmenn sem eru að stíga sín fyrstu skref.
„Við höfum talað um það áður að blaðamenn eru stundum ekki nógu hugrakkir til að spyrja sinna spurninga. Þessi blaðamaður var pottþétt mjög gagnrýninn sjálfur. Hann er að reyna að hrista upp í hlutunum en þorir ekki að segja þetta sjálfur,“ segir Lineker í hlaðvarpinu The Rest is Football.