Gunnar Birgisson samstarfsmaður Óskars Hrafns Þorvaldssonar á RÚV sér hann ekki taka við KR-liðinu á næstunni. Óskar er mikið orðaður við starfið.
Óskar hætti hjá Haugesund á dögunum og hafa verið sögur á kreiki um að hann vilji fá allar greiðslur frá Noregi áður en hann fer í nýtt starf og þá mögulega starfið hjá KR sem þjálfari.
Gunnar sem hefur verið í góðu sambandi við Óskar í mörg ár segir það af og frá. „Þetta hefur ekkert með neinn uppsagnarfrest hjá Haugesund að gera, ég sé ekki Óskar Hrafn taka við þessu KR-liði eins og staðan er núna,“ sagði Gunnar en þeir félagar hafa slegið í gegn á RÚV yfir Evrópumótinu.
Hann segir að metnaður Óskars liggi í því að þjálfa erlendis en uppsögn hans hjá Haugesund eftir nokkra leiki vakti mikla athygli.
Gunnar sér Óskar ekki taka við KR í haust. „Nei, ekki eins og staðan er núna. Miðað við það sem maður heyrir þá hefur Óskar áhuga á að þjálfa erlendis.“
Gregg Ryder var rekinn frá KR í fyrradag en Pálmi Rafn Pálmason stýrir liðinu tímabundið á meðan stjórn KR ræður ráðum sínum.