Íþróttavikan kemur út í hverri viku á 433.is og í Sjónvarpi Símans. Helgi Fannar Sigurðsson og Hrafnkell Freyr Ágústsson hafa umsjón með þættinum og með þeim í setti í þetta skiptið var Hörður Snævar Jónsson.
Íslenska karlalandsliðið var til umræðu í þættinum og auðvitað glæstur sigur á Englandi á dögunum í vináttulandsleik. Hörður segir að þó megi hrósa íslenska liðinu hafi enska liðið klárlega ekki komið í leikinn af fullum krafti.
„Ég ætla ekki að taka neitt af íslenska liðinu en maður sá það á fyrstu fimm mínútunum að enginn enskur leikmaður ætlaði að meiðast. Phil Foden hoppaði upp úr öllum tæklingum, fór ekki í neitt,“ sagði Hörður.
Hann spyr sig því hvers vegna Southgate tilkynnti ekki hóp sinn fyrir EM í Þýskalandi degi eftir leikinn við Ísland frekar en daginn áður.
„Ég skil ekki alveg Gareth Southgate að velja hópinn degi fyrir leik. Hefði einhverju breytt ef hann hefði tilkynnt hann á laugardegi, haldið öllum á tánum? Hvað áttu menn eins og Eze og Cole Palmer að sanna þarna? Öruggir inni. Þegar þú ert kominn með miðann inn á EM viltu kannski ekkert taka neina sénsa.“
Umræðan um landsliðið í heild er í spilaranum.
Íþróttavikan er í boði Bola léttöl og Lengjunnar