Brynjar Björn Gunnarsson hefur verið rekinn úr starfi þjálfara Grindavíkur. Þetta staðfestir hann við 433.is og segir það hafa komið sér gríðarlega á óvart að hafa fengið rauða spjaldið í gær.
Brynjar og Grindavík gerðu þá 2-2 jafntefli við Keflavík en uppsögn Brynjars að hans sögn tengist ekkert árangri liðsins.
„Bara beint eftir leik í gær, það var óvænt. Ég er ekki búinn að hugsa mikið um þetta, bara sofa og vakna í morgun og ekki fara yfir stöðuna,“ sagði Brynjar við 433.is en hann tók við liðinu í fy rra.
Hann segir tíðindin hafa komið a óvart en Grindavík er með fjögur stig eftir fimm leiki.
„Kom á óvart, útskýring var ekki fá stig eða þjálfunin eða undirbúningur eða æfingar. Útskýringin var samskipti við annan flokkinn,“ sagði Brynjar.
Brynjar segir að það tengist því að ungur leikmaður Grindavíkur sem á faðir sem er háttsettur í félaginu hafi ekki verið í hóp síðustu helgi og útskýrir hvað gekk á.
„Það var ekki spilatími þess drengs. Það kom upp óheppilegt atvik síðustu helgi, þar sem 19 leikmenn voru í hóp. Við erum með meiddan leikmann og taka ákvörðun hverjir spila og eru á bekk, það tekur smá tíma og orku. Aðstoðarþjálfarinn var veikur og ég var einn á svæðinu, það verður sú atburðarrás að gleymdist að láta 19 manninn vita að hann sé ekki í hóp. Hann var á skýrslu sem liðstjóri, hann átti að vera með okkur. Það gleymdist í látunum fyrir leik, það var óheppilegt og leiðinlegt fyrir strákinn. Það var upphafið og endirinn af þessu hjá mér,“ segir Brynjar.
Hann segir stigin hafa verið fá en spilamennskuna fína. „Við vorum að spila ágætlega, við erum nokkrum mínútum frá því að vinna ÍR og síðan er deildin jöfn. Grótta er í góðri stöðu og við töldum okkur nær því að vera ná sigri þar, svekkjandi að ganga í gegnum þetta allt í vetur í öllu öðru sem var í gangi. Það er svekkjandi, það er búið að taka ákvörðun og henni verður ekki breytt. Frá mínu sjónarhorni hefði mátt halda áfram,“ segir Brynjar.
Eins og flestum er ljóst hefur mikið gengið á fyrir Grindavík en bærinn hefur meira og minna verið lokaður frá því í nóvember vegna eldgosa.
„Ég vil þakka fyrir minn tíma og því góða fólki sem ég kynntist, ég vil þakka Stjörnunni, Álftanesi og fleiri liðum fyrir að hjálpa okkur í vetur. Stjarnan voru fyrstir að heyra í mér og bjóða mér aðstöðu, Álftanes og Blikarnir. Blikarnir í körfunni og Víkingar núna og við endum þar. Í þennan tíma frá desember og fram í apríl, þá var Stjarnan og Álftanes að hjálpa okkur rosalega mikið,“ segir Brynjar.
