Óskar samdi við félagið í október í fyrra en þar áður hafði náð eftirtektarverðum árangri með Breiðablik og meðal annars komið liðinu í riðlakeppni Sambandsdeildarinnar.
Aðeins sex umferðir eru búnar af norsku úrvalsdeildinni og hefur gengi Haugesund verið upp og niður. Liðið er með sex stig eftir tvo sigurleiki og fjóra tapleiki.
Meira
Óskar Hrafn óvænt hættur með Haugesund – „Þetta er mikið sjokk“
Stuðningsmenn Haugesund og norskt knattspyrnuáhugafólk hefur farið mikinn á samfélagsmiðlum frá því tíðindin bárust í morgun.
„Þetta er bara sorglegt, fyrir félagið og Haugesund,“ skrifaði einn netverji.
„Þetta er sorglegt og ég sá þetta ekki fyrir. Hélt hann yrði hér lengi,“ skrifaði annar.
Einn tók dýpra í árinni. „Hvað í fjandanum? Er þetta því illa er staðið að hlutunum þarna eða er önnur ástæða.“
Fólk veltir fyrir sér ástæðum þess að Óskar ákveði að yfirgefa félagið nú:
„Það hlýtur að vera eitthvað meira á bak við þetta en slæm úrslit.“
„Fáum við ekkert að vita um ástæðuna?“
Einn telur að Óskar hafi ekki haft leikmenn í leikkerfið sem hann vill spila.
„Synd, en að spila með kerfi sem þú hefur ekki leikmenn í gengur ekki til lengdar. Stjórnin þarf líka að sýna ábyrgð með því að kaupa inn rétta leikmenn.“
Óljóst er hvað Óskar Hrafn tekur sér næst fyrir hendur og hvort íslensk félög beri jafnvel víurnar í hann ef það fer að halla undan fæti hjá þjálfurum hér á landi.
