Ruby Mae, fyrrum kærasta Dele Alli, hefur í fyrsta sinn tjáð sig um óhugnanlegt innbrot sem átti sér stað fyrir um fjórum árum síðan.
Alli var á þessum tíma leikmaður Tottenham en hann er fyrrum enskur landsliðsmaður og leukur í dag með Everton.
Mae hefur aldrei tjáð sig um eigin reynslu af innbrotinu fyrr en núna en þjófarnir stálu verðmætum og flúðu vettvang áður en lögreglan var kölluð til.
Mae var sjálf stödd í eigin svefnherbergi er hún áttaði sig á að óboðinn gestur væri mættur á heimili þeirra en Alli og vinir hans voru á neðri hæðinni er maðurinn lét til skarar skríða.
,,Ég hélt ég myndi deyja. Ég óttaðist alls kyns hluti, þetta var eins og í bíómynd,“ sagði Ruby um málið.
,,Ég vissi aldrei hvað myndi gerast næst. Þeir réðust á Dele og neyddu hann upp stigann og í sér herbergi þar sem skáparnir eru.“
,,Vinur hans kom að mér hræddur og ég vissi um leið að eitthvað væri að, hann myndi venjulega ekki ganga inn í svefnherbergið.“
,,Í hinu herberginu var maður sem ég hélt að væri Dele en eftir að hafa kallað nafn hans þá svaraði hann ekki. Ég áttaði mig fljótt á því að hann væri ekki jafn hávaxinn og Dele eða með sömu líkamsbyggingu, hann kom að mér og var mjög ógnandi.“
,,Hann byrjaði að spyrja mig hvar allt væri í húsinu og reyndi að taka af mér skartgripina. Ég vildi bara að þetta myndi hætta, að við værum örugg.“