Tveir leikir fóru fram í 16-liða úrslitum Meistaradeildar Evrópu í kvöld og þar með eru fjögur lið komin inn í 8-liða úrslit keppninnar.

Evrópumeistarar Manchester City tók á móti FC Kaupmannahöfn, þar sem Orri Steinn Óskarsson var óvænt í byrjunarliði danska liðsins. Fyrri leiknum lauk með 1-3 sigir City í Kaupmannahöfn og því á brattann að sækja fyrir gestina.

Það var því ekki á það bætandi þegar Manuel Akanji kom City yfir strax á 5. mínútu leiksins og Julian Alvarez tvöfaldaði forskotið skömmu seinna.

Eftir tæpan hálftíma leik minnkaði Mohamed Elyounoussi muninn fyrir FCK eftir frábæra stoðsendingu Orra. Erling Braut Haaland átti hins vegar eftir að koma City í 3-1 skömmu fyrir hlé og þar við sat.

Í Madríd tóku heimamenn í Real á móti RB Leipzig. Spænska liðið vann fyrri leikinn í Þýskalandi 0-1.

Real Madrid var alls ekki sannfærandi í kvöld en komst hins vegar yfir með marki Vinicius Junior á 65. mínútu.

Willi Orban jafnaði fyrir Leipzig með frábærum skalla skömmu síðar. Þýska liðið herjaði á Madrídinga þegar leið á leikinn en tókst ekki að skora.

Real Madrid vinnur samanlagt 2-1 og fer áfram.

City og Real Madrid fara í hóp með PSG og Bayern Munchen sem einnig eru komin í 8-liða úrslit.