Íþróttavikan er á sínum stað þennan föstudaginn líkt og alltaf. Hörður Magnússon og Edda Sif Pálsdóttir fara yfir allt það helsta.

Hörður er einn dáðasti íþróttalýsandi landsins og Edda Sif er ein af stjörnum RÚV þegar kemur að umfjöllun um íþróttir.

„Ég horfði á Skagann á móti Víkingum í vikunni, það var hörkuleikur. Ég held að það sé ljóst að Víkingar muni ekki stinga af,“ segir Hörður um Bestu deildina sem fer af stað eftir rúman mánuð.

„Ef þú verður fyrir ofan Víking þá verður þú meistari, þeirra misstu Loga og Birni sem er mikill missir fyrir þá. Það er spurning hvort þeir sem þeir fengu séu á sama stað, ég set spurningarmerki við það.“

Um önnur lið hefur Hörður þetta að segja. „Breiðablik er með nýjan þjálfara, hvernig kemur það út? Breytingar í Vesturbænum og Valsmenn verða Valsmenn. Stjarnan var spútnik lið síðasta tímabils og svo FH sem komu flestum á óvart á síðustu leiktíð.“

„Það verður erfitt fyrir FH að halda því áfram, við verðum að sjá hvernig tekst til að styrkja liðin á lokametrunum.“

Edda Sif telur að spennan verði meiri. „Opnara en hefur verið, fá meira fútt út úr úrslitakeppninni.“