Randal Kolo Muani hefur ekki beint staðist væntingar síðan hann kom til Paris Saint-Germain frá Eintracht Frankfurt í sumar.
Muani kostaði PSG 90 milljónir evra og eru nú margir hissa á að franska liðið hafi borgað svo mikið fyrir leikmanninn.
Muani hefur nú svarað fyrir sig en hann hefur hingað til skorað átta mörk í 23 leikjum fyrir PSG.
,,Ég hef tekið eftir gagnrýninni síðan ég kom til PSG og það er gagnrýnin sem gerir okkur sterkari,“ sagði Kolo Muani.
,,Það er gott að vita af þessu, þetta er eins og að fá góð ráð. Þú þarft að taka við gagnrýni svo þessi sama gagnrýni geti horfið.“
,,Verðmiðinn spilar stórt hlutverk, það er auka pressa á mér og ég tek þetta skref fyrir skref.“
,,Ég skal hins vegar segja ykkur leyndarmál, með tímanum þá mun fólk segja að þetta hafi verið sanngjarnt verð fyrir Randal Kolo Muani. Ég veit að fólk er hissa í dag en þeir munu sjá af hverju.“