Landsliðsmaðurinn Logi Tómasson var gestur Helga Fannars Sigurðssonar og Hrafnkels Freys Ágústssonar í nýjasta þætti af Íþróttavikunni á 433.is.

Logi er búinn að vera valinn í landsliðið í undanförnum þremur landsleikjagluggum og þarf mikið að gerast til að hann verði það ekki áfram. Age Hareide hætti á dögunum sem landsliðsþjálfari og var bakvörðurinn knái spurður út í hvort það hafi komið á óvart.

„Bæði og. Maður var búinn að heyra að það væri mögulega eitthvað að fara að gerast. Ég var farinn að spila svo ég var sáttur með hann en það kemur í ljós hvað gerist næst,“ sagði Logi sem ber Hareide vel söguna.

„Þetta er svalur gæi og það er ára yfir honum sem mér finnst þjálfarar þurfa að vera með. Hann er vel reyndur landsliðsþjálfari og við bárum mikla virðingu fyrir honum. Þetta er flottur kall.“

Mikið hefur verið rætt um það að Arnar Gunnlaugsson taki við landsliðinu, en hann þjálfaði Loga auðvitað í nokkur ár hjá Víkingi.

„Það væri bara gaman. Ég þekki hann mjög vel og veit hvernig hann hugsar og hvernig fótbolta hann vill spila. Ég þekki kerfin hans inn og út svo ég myndi ekkert kvarta yfir því.“

Umræðan í heild er í spilaranum.