Árið 2024 var gert upp í Íþróttavikunni á 433.is á dögunum. Þá mættu Ríkharð Óskar Guðnason og Kristján Óli Sigurðsson í settið til Helga Fannars og Harðar Snævars.

Tímabilið í Bestu deild karla var að sjálfsögðu gert upp. Blikinn Kristján var að vonum sáttur með sína menn sem hömpuðu titlinum.

„Endirinn var frábær. Það var ótrúlegt hvernig þeir stigu upp eftir að hafa verið sparkað út úr Evrópu af miðlungsliði. Þá vöknuðu menn og Dóri fann liðið sitt. Hann fékk Davíð Ingvars heim og ótrúlegt en satt virtist það styrkja liðið að missa Jason út því hann er búinn að vera einn besti leikmaður Breiðabliks síðan hann mætti. Það bjuggust kannski margir við því að þeir væru að kasta inn handklæðinu með því að leyfa honum að fara í fjórðu deildarlið á Englandi. En hann fann formúluna og það var ótrúlega vel gert.“

Breiðablik og Víkingur spiluðu hreinan úrslitaleik um titilinn í lokaumferðinni. „Maður var í stúkunni og hafði eiginlega aldrei áhyggjur, maður sá eftir fimm mínútur að þetta var okkar staður og okkar stund.“

Halldór Árnason tók við Blikum fyrir tímabilið og stóð sig frábærlega. Liðið pakkaði þá ríkjandi meisturum Víkings saman í úrslitaleiknum.

„Dóri neglir þennan úrslitaleik. Ég átti ekki von á að hann myndi þora að fara maður á mann í svona leik, all-in í pressu og alla leið,“ sagði Hörður.

Breiðablik, með nýjan þjálfara, var ekki endilega í umræðunni um mögulega Íslandsmeistara fyrir tímabil.

„Það hjálpaði Blikum líka hvað þeir sigldu undir radarinn í umræðu um titilbaráttu. Það töluðu allir um einvígi Víkings og Vals, Valur búinn að setja allt í liðið og Gylfi kominn heim,“ sagði Ríkharð.

Umræðan í heild er í spilaranum.