Trent Alexander-Arnold er áfram sterklega orðaður við Real Madrid, en samningur hans við Liverpool rennur út eftir leiktíðina.

Spænski miðillinn AS segir nú að samningar milli Trent og Real Madrid séu nánast í höfn og þeir verði kláraðir í næsta mánuði, en eftir áramót má bakvörðurinn semja við önnur félög um að fara frítt til þeirra næsta sumar.

Þar segir jafnframt að Real Madrid vinni í því að halda því leyndu eins og hægt er að Trent sé á leiðinni, til þess að styggja ekki Liverpool.

Samkvæmt fréttum frá Liverpool er þó ekkert til í því að samningar séu að nást. Framtíð Trent sé áfram í lausu lofti. Hinn virti Fabrizio Romano hefur tekið undir þetta.

Eitt er þó víst. Liverpool þarf að semja við Trent sem allra fyrst, vilji félagið halda honum.