Mohamed Salah er að eiga hreint ótrúlegt tímabil með Liverpool. Hann er þó ekkert að spá í eftirsóttustu einstaklingsverðlaunum fótboltans, Ballon d’Or.
Hinn 32 ára gamli Salah er kominn með 20 mörk og 17 stoðsendingar í öllum keppnum með Liverpool fyrir áramót. Lið hans er langefst í ensku úrvalsdeildinni.
Eftir enn eina ótrúlegu frammistöðuna gegn West Ham í gær var Salah spurður út í Ballon d’Or.
„Ég er ekkert að hugsa um Ballon d’Or. Ég vil vinna ensku úrvalsdeildina og mun gera allt sem ég get til að það takist,“ sagði hann þá.
„Það eru önnur lið með sama markmið svo við verðum að vera auðmjúkir og halda einbeitingu.“
Framtíð Salah hefur mikið verið í umræðunni, en núgildandi samningur hans við Liverpool rennur út eftir leiktíðina. Það er alls óvíst hvar hann verður á næstu leiktíð.
