Árið var gert upp í nýjasta þætti Íþróttavikunnar. Þá mættu Ríkharð Óskar Guðnason og Kristján Óli Sigurðsson í settið til Helga Fannars og Harðar Snævars.

Það var rætt um KR í þættinum, en liðið olli miklum vonbrigðum í Bestu deild karla í sumar þrátt fyrir að hafa aðeins rétt úr kútnum í restina. Lokaniðurstaðan var 8. sæti, 2. sætið í neðri hlutanum, og var liðið í fallbaráttu lengi vel.

„Gríðarleg vonbrigði, þó þeir hafi endað tímabilið vel. Enda er búið að umturna öllu í Vesturbænum. Menn eru að koma inn með hundruðir milljóna í nýja leikmenn, þeir eru komnir með þjálfarann sem þeir voru að bíða eftir lengi. Svo mætir hann og þá kemur gervigras. Ég hef sjaldan verið jafnspenntur fyrir neinu og KR næsta tímabil,“ sagði Ríkharð í þættinum, en Óskar Hrafn Þorvaldsson tók við á síðasta tímabili og bantaði gengið töluvert undir hans stjórn.

Gregg Ryder hóf tímabilið með liðið var það í frjálsu falli þar til hann var loks látinn fara. Hann vann þó fyrstu tvo leiki sína í Bestu deildinni og rifjar Ríkharð upp þegar stuðningsmenn KR keyptu heilsíðu í Morgunblaðinu í kjölfarið. Voru aðrir stuðningsmenn Vesturbæjarliðsins þar hvattir til að mæta á leiki karlaliðsins.

„Hann byrjar á tveimur sigrum og svo ákveða stuðningsmenn að setja einhverja heilsíðu í Moggann um að KR væri eina stórveldið. Svo um leið og það fór að halla undan fæti þá átti hann engan séns,“ sagði Ríkharð.

Auglýsinguna sem um ræðir má sjá hér að neðan.