Sævar Atli Magnússon, landsliðsmaður og leikmaður Lyngby í Danmörku, var gestur Helga Fannars Sigurðssonar og Hrafnkels Freys Ágústssonar í Íþróttavikunni á 433.is á dögunum.

Sævar gekk í raðir Lyngby árið 2021, þá var liðið í dönsku B-deildinni en fór upp á fyrsta tímabili Íslendingsins. Freyr Alexandersson sótti Sævar til Lyngby, en hann yfirgaf félagið fyrir um ári síðan.

„Ég er búinn að þroskast og breytast mikið sem leikmaður. Ég kom þarna út sem nánast hreinræktaður framherji. Ég spilaði ekki mikið fyrsta tímabilið í B-deildinni en var að koma mikið inn á. Svo á ég tvo lélega mánuði í nóvember og desember þar sem ég brenn eiginlega út. Þá kemur þetta langa jólafrí sem hentaði mér mjög vel og ég kom mun sterkari inn eftir jól.

Ég vissi alltaf að fyrsta árið færi í að reyna að koma mér inn í hlutina og Freysi sagði það alltaf við mig. En það tók í rauninni eitt og hálft ár,“ sagði Sævar um upphaf sitt hjá Lynbgy, en ekki er algengt að leikmaður sé eins lengi hjá félaginu og hann hefur verið.

Sævar rifjaði svo upp þegar Alfreð Finnbogason gekk í raðir Lyngby og hvernig áhrif það hafði á hann sem leikmann.

„Þegar hann kom inn breyttist ég smá sem leikmaður og fór að spila sem „hybdrid“ átta og það hentaði mér því ég er mjög sterkur varnarlega.“

Umræðan í heild er í spilaranum.