Guðmundur Benediktsson, ástsælasti íþróttalýsandi þjóðarinnar, var gestur Helga Fannars Sigurðssonar og Hrafnkels Freys Ágústssonar í nýjasta þætti af Íþróttavikunni á 433.is.

Freyr Alexandersson og brottrekstur hans frá belgíska liðinu Kortrijk hefur mikið verið í umræðunni undanfarna daga. Freyr hafði verið með liðið í um ár og bjargaði því frá falli á ótrúlegan hátt í vor. Það gekk hins vegar ekki eins vel á fyrri hluta þessarar leiktíðar.

„Þetta gekk ótrúlega vel á síðustu leiktíð en það er held ég ótrúlega erfitt að fara inn í annað tímabil þar sem liðið breytist ekki mikið milli tímabila. Af því liðið bjargaði sér á einhvern ótrulegan máta er bara eins og menn hafi trúað því að þá væri þetta allt í lagi. Það var greinilega ekkert allt í góðu lagi þarna,“ sagði Guðmundur um málið.

„Þegar Freysi sagðist ekki hafa áhyggjur af því að missa starfið sitt, þá einhvern veginn vissi ég að hann myndi missa starfið sitt. Ég held að slíkt fari heldur aldrei vel í eigendur. Ég held að þeir vilji að þjálfarinn hafi smá áhyggjur af því að missa starfið sitt. Þess vegna komu þessar fréttir mér ekkert sérstaklega á óvart.“

Hrafnkell benti þá á að Freyr hafi hafnað því að taka við belgíska stórlðinu St. Gilloise í sumar. „Það má alveg deila um það núna hvort hann hefði átt að taka því.“

Guðmundur telur að auðveldara sé að láta íslenska þjálfara í heimsfóboltanum þar sem þeir eru yfirleitt ekki með stórt teymi með sér.

„Við höfum ekki náð að komast á þann stall að þjálfarar sem koma frá Íslandi taki staffið sitt með, þeir séu með stuðninginn og það geri liðunum erfiðara fyrir að reka þá. Þá væru þeir að reka einhverja fjóra með og þú þarft að hugsa það aðeins meira. Við höfum ekki ennþá komist á þennan stað.“

Umræðan í heild er í spilaranum.