Sævar Atli Magnússon, landsliðsmaður og leikmaður Lyngby í Danmörku, var gestur Helga Fannars Sigurðssonar og Hrafnkels Freys Ágústssonar í Íþróttavikunni á 433.is á dögunum.

Sævar hefur verið á mála hjá Lyngby síðan 2021 og á tíma sínum hjá félaginu spilað með bæði Gylfa Þór Sigurðssyni og Alfreð Finnbogasyni. Hann lærði mikið af þessum tveimur að eigin sögn.

„Alfreð skildi eftir sig mjög margt. Aðallega hvernig þú átt að haga þér utan vallar, borða og svoleiðis,“ sagði Sævar.

„Að sjá hvernig Gylfi æfði var bara rugl. Hann hljóp mest, var ekki hægt að tala við hann þegar hann tapaði í 5 á 5. Þá labbaði hann trylltur í burtu.“

Um tíma voru Sævar og Alfreð einu tveir Íslendingarnir hjá Lynbgy en þegar mest lét voru fjórir íslenskir leikmenn þar á mála.

„Alfreð hélt rosalega vel utan um mig þegar við vorum bara tveir þarna í sex mánuði, var alltaf að bjóða mér í mat og kenna mér eitthvað. Það sem ég tók mest frá honum er að fyrir næstum því hvern einasta leik labbaði hann upp að mér og sagði: „Sævar, hættu að ofhugsa svona mikið.“ Ég var oft mikið að ofhugsa hlutina,“ sagði Sævar.

Umræðan í heild er í spilaranum.