Eins og greint var frá því í gær þá sást enski landsliðsmarkvörðurinn Jordan Pickford með konunni umdeildu Lauryn Goodman.

Goodman á tvö börn með liðsfélaga Pickford, Kyle Walker, en þeir hafa lengi verið saman í enska landsliðinu.

Walker hélt allavega tvívegis framhjá eiginkonu sinni með Goodman og barnaði hana tvisvar í kjölfarið.

Í gær var sagt frá því að Pickford hafi sést á skemmtistað með Goodman síðasta sunnudag og að þau hafi notið kvöldsins saman ásamt öðrum leikmönnum Everton þar sem Pickford spilar.

Nú er hins vegar talað um það að Pickford hafi ekki haft hugmynd um að hann væri að kaupa áfengisskot fyrir Goodman sem einhvern veginn blandaði sér inn í skemmtunina.

Nýtt vitni hefur stigið fram og tjáð sig um málið og segir að Pickford hafi alls ekki verið sáttur eftir að hann komst að því að Goodman væri að skemmta sér ásamt leikmönnum Everton.

,,Jordan hafði ekki hugmynd um að hann væri að kaupa drykki fyrir Lauryn. Þegar leikmennirnir áttuðu sig á stöðunni þá báðu þeir öryggisverði um að fjarlægja hana,“ segir vitnið.

Aðrir segja þó að Pickford hafi verið meðvitaður um hvað hann væri að gera en hvor sagan er trúverðugri er erfitt að segja til um.