Guðmundur Benediktsson, ástsælasti íþróttalýsandi þjóðarinnar, var gestur Helga Fannars Sigurðssonar og Hrafnkels Freys Ágústssonar í nýjasta þætti af Íþróttavikunni á 433.is.

Það var aðeins rætt um ítalska liðið Fiorentina í þættinum, en með því leikur sonur Guðmundar, Albert. Þar er einnig á mála fyrrum markvörður Manchester United, David De Gea og hefur Guðmundur miklar mætur á honum. Spánverjinn var umdeildur á meðal stuðningsmanna United.

„Ég held það sjái það allir að David De Gea var ekki vandamálið í þessu liði. Hann er búinn að vera stórkostlegur í Flórens eftir að hafa tekið sér þetta eitt ár í hlé,“ sagði hann, en De Gea yfirgaf United 2023 áður en hann gekk í raðir Fiorentina í sumar.

„Eftir því sem ég kemst næst er hann líka stórkostlegur gæi. Það er ekki vesen á honum. Hann er tjillaður og hefur ekki áhyggjur af miklu í lífinu.“

Guðmundur segir Albert tala afar vel um De Gea.

„Hann segir að þetta sé einhver mesti toppmaður sem hann hefur hitt. Það er enginn ríkari en hann þarna, búinn að koma sér vel fyrir í lífinu. En hann segir að hann sé jarðbundnasti gæi sem til er. Þar fyrir utan er stórkostlegur markmaður.“

Umræðan í heild er í spilaranum.