Þorvaldur Örlygsson, formaður KSÍ, segir leit að nýjum þjálfara íslenska karlalandsliðsins ganga vel. Það sé hins vegar ólíklegt að hann verði ráðinn fyrir jól.

Age Hareide hætti sem landsliðsþjálfari nýlega og síðan hefur leit að nýjum manni staðið yfir. Arnar Gunnlaugsson, þjálfari Víkings, hefur verið sterklega orðaður við stöðuna. Þá hefur Freyr Alexandersson, sem nú er án starfs eftir að hafa verið sagt upp hjá Kortrijk, einnig verið nefndur til sögunnar.

„Við erum kom­in á góðan stað í dag en mér finnst ólík­legt að við fáum nýj­an þjálf­ara í jóla­gjöf. Þetta er ákveðið ferli, sem við erum að klára inn­an­húss, um það hvernig við sjá­um þetta fyr­ir okk­ur og hvernig mann­eskju við erum að leita að. Ég geri fast­lega ráð fyr­ir því að lín­ur verði farn­ar að skýr­ast eft­ir tvær til þrjár vik­ur,“ segir Þorvaldur við mbl.is.

„Það hafa mörg nöfn verið nefnd til sög­unn­ar í fjöl­miðlum en það hef­ur eng­inn verið boðaður í viðtal enn sem komið er. Við höf­um rætt við fólk í kring­um okk­ur og inn­an knatt­spyrnu­hreyf­ing­ar­inn­ar og svo kem­ur að þeim tíma­punkti að við för­um í það að ræða beint við mögu­lega þjálf­ara.

Við mun­um ræða við þrjá til fjóra þjálf­ara og mynda okk­ur svo skoðanir út frá þeim viðtöl­um. Eins og ég kom inn á áðan væri frá­bært ef næsti landsliðsþjálf­ari yrði Íslend­ing­ur en stund­um er það ein­fald­lega ekki hægt,“ segir Þorvaldur, sem vill helst ráða innlendan þjálfara.