Tómas Bent Magnússon er genginn í raðir Vals frá ÍBV. Skiptin hafa legið í loftinu en eru nú staðfest.

Um er að ræða 22 ára gamlan miðjumann og gerir hann þriggja ára samning á Hlíðarenda.

Tómas spilaði stóra rullu er ÍBV fór upp úr Lengjudeildinni og í þá Bestu í haust.

Tilkynning Vals
Tómas Bent Magnússon 22 ára miðjumaður skrifaði í dag undir þriggja ára samning við okkur í Val. Tómas Bent kemur til okkar frá ÍBV þar sem hann hefur verið lykilmaður síðustu ár og átti frábært tímabil með eyjamönnum sem fóru upp úr Lengjudeildinni í sumar.

„Tómas hefur verið að æfa með okkur undanfarið og þjálfarateymið hefur hrifist mjög af frammistöðunni. Hann er leikmaður sem við teljum að muni styrkja hópinn okkar enda býr hann yfir hæfileikum sem öll alvöru lið þurfa. Það fer gott orð af honum og við sjáum það strax að þetta er strákur sem ætlar sér langt. Við munum gera það sem við getum til að hann nái sínum markmiðum á sama tíma og hann mun hjálpa okkur að verða enn betra lið,“ segir Björn Steinar Jónsson formaður knattspyrnudeildar Vals.

Við bjóðum Tómas Bent hjartanlega velkominn í Val.