Miðvörðurinn gekk í raðir United frá Leeds 2002 á rúmlega 30 milljónir punda. Varð hann þar með dýrasti leikmaður í sögu Bretlands á þeim tímapunkti. Ferdinand segir þó sjálfur að hegðun hans utan vallar hafi ekki verið til eftirbreytni, en hann fór mikið út á lífið á kvöldin.
„Ég elskaði að fara út að skemmta mér. Ég var sennilega í versta mögulega umhverfinu hjá West Ham. Sama hvernig leikirnir fóru þá var liðsrútan eins og skemmtistaður. Svo fór ég til Leeds og þar var mun meiri fagmennska, en ég fór samt út að skemmta mér,“ rifjar Ferdinand upp í hlaðvarpi sínu.
„Þegar ég kom fyrst til United meiddist ég á undirbúningstímabilinu, rétt áður en ný leiktíð hófst og var frá í sex vikur. Þá fór ég út öll kvöld. Mig langaði að sjá hvernig andrúmsloftið væri. Stjórinn komst hins vegar að þessu og hann kom mér niður á jörðina: „Ef þig langar að vera hér skaltu passa hvernig þú hagar þér,“ segir Ferdinand og þessi ummæli breyttu öllu.
„Ég áttaði mig á að ef mig langaði að ná árangri yrði ég að haga mér eins og atvinnumaður, passa inn með hinum. Ég áttaði mig á að Gary Neville, Paul Scholes, Roy Keane og Ruud van Nistelrooy voru ekki að fara út að skemmta sér og æfingarnar voru ansi góðar. Þarna bætti ég mig og varð betri leikmaður.“
