Mohamed Salah er opinn fyrir því að skrifa undir eins árs framlengingu á samningi sínum við Liverpool til að róa sögurnar í kringum framtíð hans.

The Athletic segir frá þessu, en samningur Salah rennur út næsta sumar og hefur hann verið sterklega orðaður annað.

Hinn 32 ára gamli Salah er sagður pirraður á þeim sem ráða hjá Liverpool en hann vill hærri laun en þeir eru til í að bjóða honum. Egyptinn skrifaði undir þriggja ára samning sem innihélt 350 þúsund pund í vikulaun árið 2022. Vill hann skrifa undir svipað langa framlengingu með enn frekari launahækkun.

Salah má ræða við önnur félög frá byrjun næsta árs um að fara frítt þangað næsta sumar. Hann hefur til að mynda verið orðaður við Paris Saint-Germain og fjölda liða í Sádi-Arabíu.

Sjálfur vill Salah þó helst vera áfram hjá Liverpool og er sem fyrr segir til í að skrifa undir stutta framlengingu í bili samkvæmt nýjustu fréttum.