Pep Guardiola hefur minnt fólk á þann árangur sem hann hefur náð með Manchester City á undanförnum átta árum.

Guardiola er einn besti ef ekki besti þjálfari sögunnar en hann hefur gert ótrúlega hluti í Manchester síðustu ár.

Gengi City hefur hins vegar verið afskaplega slæmt á undanförnum vikum og er liðið mikið í umræðunni vegna þess.

Guardiola segir að það sé ekki óeðlilegt að lið í hvaða íþrótt sem er þurfi að upplifa ákveðinn lágpunkt eftir mörg virkilega góð ár.

,,Ég vil ekki flýja. Ég vil vera hérna og endurbyggja liðið á marga vegu,“ sagði Guardiola við blaðamenn.

,,Á næsta tímabili þá reynum við að vera á meðal þeirra bestu. Getiði nefnt mér eitt lið á síðustu tíu árum sem hefur sýnt stöðugleika öll þau ár?“

,,Það er ekki til, ekki einu sinni í NBA deildinni, ekki í tennis og ekki í golfi. Ekki í neinni íþrótt.“