KR og Eyþór Aron Wöhler hafa komist að samkomulagi um að Eyþóri sé frjálst að leita á önnur mið. Eyþór gekk í raðir KR frá Breiðablik stuttu fyrir síðasta tímabil og spilaði 22 leiki í deild og bikar og skoraði í þeim þrjú mörk

„Við þökkum Eyþóri fyrir veru hans í KR og óskum honum góðs gengis í hverju því sem hann tekur sér fyrir hendur,“ segir Páll Kristjánsson, formaður knattspyrnudeildar KR.

„Ég kveð KR með söknuði, þetta er frábær klúbbur með einstaka stuðningsmenn og ég óska klúbbnum alls hins besta. Ég lagði hart að mér og vildi auðvitað fá meiri spiltíma en ég geri mér grein fyrir því og virði að það er þjálfarinn sem velur liðið og það eru margir góðir knattspyrnumenn í KR sem ég er í samkeppni við. Því þarf ég að stíga eitt skref til baka og fara í klúbb þar sem ég fæ meiri spiltíma og get sannað mig sem alvöru senter. Og það ætla ég að gera,” segir Eyþór Wöhler.