Hilmar Árni Halldórsson, sem lagði skóna á hilluna á dögunum, var gestur Helga Fannars Sigurðssonar og Hrafnkels Freys Ágústssonar í nýjasta þætti af Íþróttavikunni, sem kemur út alla föstudaga á 433.is.

Hilmar, sem átti glæsilegan feril með Stjörnunni, snýr sér nú að þjálfun yngri flokka félagsins en hann lauk einnig meistaragráðu í heimsspeki í sumar. Mun hann nýta það í starfi sínu en til hliðar er hann að hrinda af stað hlaðvarpi ásamt góðum félaga.

„Það er aðeins öðruvísi nálgun á íþróttina. Mér finnst mjög gaman að pæla í íþróttum frá heimspekilegu sjónarhorni. Í tengslum við það er ég að fara í smá verkefni með Arnari Guðjóns körfuboltaþjálfara. Hann hringdi í mig og bað mig um að gera podkast með sér. Ég hélt að ég yrði aldrei týpan sem yrði hluti af svoleiðis,“ sagði Hilmar léttur.

„Það er meira verið að pæla í hlutum eins og þegar illa gengur, hvernig hugsarðu um þig, berðu þig sem leiðtogi þegar þú ert mögulega að tapa öllu. Þessir vinklar sem manni finnst kannski ekki mjög oft rætt um en þú ert mjög kunnugur sem íþróttamanneskja.

Við erum að fá til okkar þjálfara úr öllum boltagreinunum og pælingin er bara að fara í allar íþróttir.“

Umræðan í heild er í spilaranum.