Ruben Amorim segir að það hafi verið hans draumur að fá að taka við stórliði Manchester United.
Amorim hefur samþykkt að taka við United af Erik ten Hag en sá síðarnefndi var rekinn frá félaginu á dögunum.
Amorim tekur við þann 11. nóvember en hann hefur verið orðaður við þónokkur félög síðustu mánuði og þar á meðal Liverpool.
Portúgalinn horfði þó alltaf til United að eigin sögn en hann hefur gert frábæra hluti með Sporting Lisbon í Portúgal.
,,Ég hef fengið mörg símtöl frá mörgum félögum á undanförnum mánuðum en það félag sem ég vildi var Manchester United,“ sagði Amorim.
,,Það er ekki til stuðningsmaður Sporting sem vildi að ég myndi klára tímabilið hérna meira en ég sjálfur. Það var hins vegar ekki hægt.“
