Age Hareide ræddi við Stöð 2 Sport í kvöld eftir leik Íslands og Wales í Þjóðadeildinni sem tapaðist 4-1.

Ísland endar í þriðja sæti riðilsins eftir tapið en hafði möguleika á öðru sætinu með sigri í kvöld – strákarnir komust í 1-0 áður en Wales skoraði fjögur.

,,Við töpuðum leiknum og misstum leikmenn í miðjum leik og fyrir leik, þetta var erfið vika fyrir okkur,“ sagði Age.

,,Það vantaði leikmenn í hópinn og það getur gert menn stressaða. Við gerðum barnaleg mistök og þetta var ekki góður dagur. Við byrjuðum vel og skoruðum mark og svo í seinni hálfleik þá reyndum við að pressa á þá og skapa fleiri færi en við nýttum þau ekki og þú þarft að gera það á þessu stigi.“

,,Við þurfum á öllum að halda til að ná okkar markmiðum. Strákarnir lögðu sig alla fram í verkefnið og ef staðan hefði verið 1-1 í hálfleik væri verkefnið auðveldara og það var óþarfi að fá á sig þetta seinna mark í fyrri hálfleik.“

Age ræddi svo sína eigin framtíð en hann vildi ekki staðfesta hvort þetta hafi verið hans síðasti leikur við stjórnvölin.

,,Ég veit það ekki. Samningurinn minn rennur út þann 30. nóvember og þá er hægt að ræða málin ekki í kvöld. Mér líkar að vinna með þessum leikmönnum, góðum hóp af leikmönnum og að vera með alla til taks er mikilvægt. Þetta er ekki mín ákvörðun, þú verður að spyrja KSÍ.“