Í íslenskum fótboltaheimi er fátt annað rætt en staða Age Hareide sem landsliðsþjálfara. Hefur þetta verið til umræðu í tæpan mánuð.

KSÍ er með uppsagnarákvæði í samningi sínum sem hægt er að nota á næstu dögum. Vanda Sigurgeirsdóttir og fyrrum stjórn sambandsins endursamdi við Hareide fyrr á þessu ári.

Ákveðið var að setja ákvæðið í samning Hareide þar sem vitað var að nýr formaður og stjórn væru að koma til starfa. Þorvaldur Örlygsson stýrir nú málum.

„Það verða endalaus samtöl eftir leikinn gegn Tyrkjum, ég kem á föstudegi og segi að það séu allir að setja þetta í eyrun á mér. Age er minn maður, Vanda hlustaði á Dr. Football,“ sagði Hjörvar Hafliðason í nýjasta þætti af hlaðvarpinu vinsæla.

„Hún reddaði besta gæjanum í giggið, Age hefur stuðning þjóðarinnar. Af hverju haldiði að þetta hafi farið svona mikið í umræðuna?.“

Jóhann Már Helgason sérfræðingur þáttarins lagði orð í belg. „Það er verið að segja að þetta sé út frá peningum, svo er það að hann sé ekki að sinna þessu nógu vel. EF við náum úrslitum gegn Wales, förum upp í efstu deild þá væri galið að reka hann.“

Íslenska liðið mætir Wales annað kvöld og sigur kemur liðinu í umspil um laust sæti í A-deild Þjóðadeildarinnar.

„Það var einhver þjálfari innan KSÍ sem sagði á skrifstofunni í haust, sagðist vera farin í sumarhúsið á Spáni og sagði að það væri hægt að ná í sig á Teams. Smá sneið,“ sagði Hjörvar og átti þar við þá gagnrýni um að Hareide hefði ekki sinnt starfinu nógu vel.

„Ef þetta eru peningar, þá sjálfsögðu. Ef þeir upplifa að hann sé búinn, að það sé ekki hægt að kreista fram meiri töfra. Gæinn tekur við hörmulegu dæmi, vinnur frábæra sigra. Spilum skemmtilegan fótbolta, þetta var góður leikur gegn Tyrkjum. Frábært lið og það var gaman á Laugardalsvelli,“ sagði Hjörvar einnig.