Pep Guardiola er búinn að samþykkja það að skrifa undir nýjan samning við Englandsmeistara Manchester City.
Football Insider fullyrðir þessar fréttir en Guardiola hefur undanfarin átta ár starfað sem þjálfari City.
Framtíð Guardiola hefur verið í umræðunni undanfarið þar sem samningur hans við liðið rennur út næsta sumar.
Samkvæmt heimildum Football Insider þá mun Guardiola krota undir eins árs framlengingu og er því bundinn til 2026.
Í greininni kemur fram að samkomulag á milli Guardiola og City sé 99,9 prósent klárt og er Spánverjinn því líklega ekki að kveðja í bili.
Guardiola hefur náð stórkostlegum árangri með City og hefur unnið allt mögulegt með félaginu á sínum tíma þar.
