Tyrell Malacia á medalíu fyrir það að vinna enska bikarinn með Manchester United þrátt fyrir að hafa spilað lítið sem ekkert á því tímabili.

Ástæðan er liðsfélagi hans Casemiro hjá United en hann ákvað að gefa vini sínum eigin medalíu eftir sigur á Manchester City í úrslitaleik.

Malacia hafði glímt við erfið meiðsli og mætti til að styðja við bakið á sínum liðsfélögum og var illa við að fagna sigrinum til að byrja með áður en hann fékk stuðning frá Brasilíumanninum.

,,Auðvitað vildi ég mæta og styðja við bakið á strákunum en það var erfitt að fagna sigrinum þar sem ég var ekki með liðinu alla leið,“ sagði Malacia.

,,Ég hugsaði með mér að ég gæti fengið mér sæti og leyft þeim að fagna og svo hitti ég þá í búningsklefanum.“

,,Casemiro kom að mér og sagði: ‘Nei þú verður að koma með okkur.’ Ef einhver með hans reynslu segir það við þig þá ertu að hlusta.“

,,Hann sagði við mig að ég væri enn hluti af liðinu og hluti af búningsklefanum og að ég hafi orðið vitni að öllu saman.“