Íslenska karlalansdsliðið vann sinn annan leik í Þjóðadeildinni í kvöld en leikið var við Svartfjallaland ytra.

Fyrri leikur þessara liða fór fram á Laugardalsvelli þar sem okkar menn höfðu betur með tveimur mörkum gegn engu.

Það sama var upp á teningnum í kvöld en Ísland vann 2-0 sigur og er nú með sjö stig í riðli fjögur í B deildinni.

Orri Steinn Óskarsson skoraði fyrra mark Íslands með laglegu skoti og ekki löngu seinna bætti Ísak Bergmann Jóhannesson við öðru.

Orri ræddi við Stöð 2 Sport eftir leikinn og hafði þetta að segja:

,,Það höfðu ekki komið mörg færi í leiknum og við vissum að þetta yrði svona. Þetta er ekki góður völlur og aðstæðurnar eru ekki til fyrirmyndar. Við vissum að þetta yrði hark en við vissum að við gætum skorað eitt eða tvö eins og við gerðum í lokin,“ sagði Orri.

,,Þetta snýst um hugarfar, hvernig við bregðumst við döprum fyrri hálfleik. Við þurftum að fá meiri ró á spilið og stjórna leiknum betur og uppskárum tvö mörk.“

,,Það er ömurlegt að sjá alla leikmenn fara af velli sem meiðast og þá sérstaklega Aron sem er okkar leiðtogi en Gulli kom frábærlega inn og spilaði geggjaðan leik. Það var frábært að sjá hans reaction.“