Albert Brynjar Ingason sérfræðingur hjá Stöð2 Sport og stjórnandi Gula spjaldsins telur að Gylfi Þór Sigurðsson hefði mætt í núverandi landsliðsverkefni ef Age Hareide væri hættur í starfi.

Gylfi fékk örfáar mínútur í síðasta verkefni hjá Hareide í leikjum gegn Wales og Tyrklandi. Liðið er nú á leið í leiki gegn Svartfjallalandi og Wales í Þjóðadeildinni.

Albert sem hefur mikið tjáð sig um landsliðið síðustu ár les svona í stöðuna. „Gylfi fór í viðtal hjá Dr. Football og sagði að þetta væri sameiginleg ákvörðun að hann yrði ekki. Svo fer Age í viðtal í aðdraganda þessa leikja og segir að Gylfi hafi hringt í KSÍ og beðið um að vera tekinn úr hópnum. Ég er ekki sannfærður um það að Gylfi hefði gert það ef það hefði verið komin nýr í þjálfari, fyrir mér er það nokkuð ljóst að Gylfi er að bíða eftir því að Age fari,“ sagði Albert í Gula spjaldinu.

Albert telur að það sitji í Gylfa hversu fáar mínútur hann fékk í síðasta verkefni. „Ég held að það sitji í honum, hann var ósáttur. Við sáum það eftir leik Vals og FH, þar var hann þungur og talaði jafnvel um að hætta,“ sagði Albert en minnti þó að Gylfi hafi verið að eignast sitt annað barn með eiginkonu sinni.

Albert fór svo að ræða þá sögu sem flýgur hátt að KSÍ muni segja upp samningi Hareide eftir leikina.

„Svo er umræðan um Age sé að hætta eftir þessa tvo leiki, það er alltaf að verða meira og meira sem maður heyrir af því. Ég held að ef einhver annar þjálfari væri kominn fyrir þessa leiki, Gylfi er bara í fótbolta fyrir landsliðið. Það sem hann segir í Dr. Football og það sem Age segir svo, það hljómar ekki eins og sameiginleg ákvörðun.“