Víkingur hefur verið sektað um 224 þúsund krónur vegna stuðningsmanna félagsins, ástæðan eru blys sem stuðningsmenn kveiktu á í tveimur leikjum.
Um er að ræða úrslitaleikinn gegn Breiðablik og næst síðasta leik sumarsins gegn ÍA.
Fær Víkingur 150 þúsund króna sekt fyrir leikinn gegn Breiðablik og 75 þúsund krónur fyrir atvikið gegn ÍA.
Breiðablik fær sekt fyrir stuðningsmenn sína sem kveiktu einnig á blysum í úrslitaleik Bestu deildarinnar þar sem Breiðablik varð Íslandsmeistari.
Víkingur R. vegna framkomu áhorfenda – Blys
Úr úrskurði:
„Á fundi nefndarinnar þann 29. október 2024 lá fyrir greinargerð frá knattspyrnudeild Víkings R. Að virtri greinargerð knattspyrnudeildar Víkings R. og öðrum fyrirliggjandi gögnum er það álit nefndarinnar að framkoma áhorfenda í framangreindum leik ÍA og Víkings R. hafi verið vítaverð og hættuleg og falli undir ákvæði 13.9.d. í reglugerð KSÍ um aga- og úrskurðarmál.
Með vísan til framangreinds ákvað aga- og úrskurðarnefnd KSÍ að sekta Knattspyrnudeild Víkings R. vegna framkomu áhorfenda, nánar tiltekið vegna notkunar á blysum í áhorfendastúku. Þykir upphæð sektar knattspyrnudeildar Víkings R. hæfilega ákveðin kr. 75.0000,-. Við ákvörðun viðurlaga knattspyrnudeildar Víkings R: tekur nefndin mið af úrskurði á hendur knattspyrnudeild Víkings R. dags. 11.6.2024. Hefur úrskurður í fyrirliggjandi máli því ítrekunaráhrif sem sektarákvörðun tekur mið af.“
Breiðablik vegna framkomu áhorfenda
Úr úrskurði:
„Á fundi nefndarinnar þann 5. nóvember 2024 lá fyrir greinargerð frá knattspyrnudeild Breiðablik. Að henni virtri og öðrum fyrirliggjandi gögnum er það álit nefndarinnar að framkoma áhorfenda í framangreindum leik Víkings R. og Breiðablik hafi verið vítaverð og hættuleg og falli undir ákvæði 13.9.d. í reglugerð KSÍ um aga- og úrskurðarmál.
Með vísan til framangreinds ákvað aga- og úrskurðarnefnd KSÍ að sekta Knattspyrnudeild Breiðabliks vegna framkomu áhorfenda, nánar tiltekið vegna notkunar á blysum í áhorfendastúku. Þykir upphæð sektar knattspyrnudeildar Breiðabliks hæfilega ákveðin kr. 50.000,-.“
Víkingur R. vegna framkomu áhorfenda
Úr úrskurði:
„Á fundi nefndarinnar þann 5. nóvember 2024 lá ekki fyrir greinargerð frá knattspyrnudeild Víkings R. Að því virtu og öðrum fyrirliggjandi gögnum er það álit nefndarinnar að framkoma áhorfenda í framangreindum leik Víkings R. og Breiðablik hafi verið vítaverð og hættuleg og falli undir ákvæði 13.9.d. í reglugerð KSÍ um aga- og úrskurðarmál.
Með vísan til framangreinds ákvað aga- og úrskurðarnefnd KSÍ að sekta Knattspyrnudeild Víkings R. vegna framkomu áhorfenda, nánar tiltekið vegna notkunar á blysum í áhorfendastúku. Þykir upphæð sektar knattspyrnudeildar Víkings R. hæfilega ákveðin kr. 150.000,-. Við ákvörðun viðurlaga knattspyrnudeildar Víkings R. tekur nefndin mið af úrskurðum á hendur knattspyrnudeild Víkings R. dags. 11.6.2024 og 30.10.2024. Hefur úrskurður í fyrirliggjandi máli því ítrekunaráhrif sem sektarákvörðun tekur mið af.“
