Neymar var ekki valinn í brasilíska landsliðshópinn fyrir verkefni gegn Venesúela og Úrúgvæ í undankeppni HM.

Neymar er spilar sinn fótbolta í Sádi Arabíu í dag en hann er á mála hjá Al-Hilal og var að snúa aftur eftir erfið meiðsli.

Neymar hefur lítið sem ekkert spilað á þessu ári en kom nýlega við sögu hjá félagsliði sínu og er allur að koma til.

Dorival Junior er þjálfari Brasilíu í dag en hann segir að Neymar hafi viljað vera valinn en að Brasilía þurfi að sýna félagsliði hans ákveðna virðingu.

Neymar meiddist alvarlega í landsleik með Brasilíu í fyrra og væri álagið mögulega of mikið að spila með báðum liðum.

,,Við vildum ekki flýta okkur of mikið. Hann er búinn að jafna sig en hefur aðeins spilað nokkrar mínútur sem spilaði stóran þátt í ákvörðuninni,“ sagði Dorival.

,,Hann var til í að koma og vera með landsliðinu en skildi líka stöðuna sem hann er í, hann hefur spilað 13 mínútur á árinu.“

,,Við verðum að virða hans félagslið. Það er þó alltaf mikilvægt fyrir okkur að vera með leikmann eins og hann í okkar röðum þó hann sé ekki í toppstandi.“