Allir þeir sem einhverju ráða hjá Manchester United munu funda í vikunni, sagt er að fundurinn fari fram í London á morgun en þar gæti framtíð Erik ten Hag ráðist.

Mikil pressa er á stjórnendum United að taka ákvörðun um það hvað skal gera.

United er aðeins með átta stig eftir sjö leiki í ensku deildinni, versta byrjun í sögu liðsins í úrvalsdeildinni.

Manchester Evening News sem er staðarblaðið í Manchester segir að Thomas Tuchel sé efstur á óskalista þeirra sem ráða ef farið verður í breytingar.

Tuchel fór í viðræður við United í sumar þegar félagið skoðaði að reka Ten Hag en ekkert varð úr því.

Tuchel hætti með Bayern í sumar og er án félags og gæti því hoppað strax inn ef samningar nást um kaup og kjör.