Markvörðurinn Jökull Andrésson var gestur þeirra Helga Fannars Sigurðssonar og Hrafnkels Freys Ágústssonar í Íþróttavikunni þennan föstudaginn, en þátturinn kemur út á 433.is vikulega.

Það vakti athygli á dögunum þegar Age Hareide, landsliðsþjálfari Íslands, sagðist ekki alveg nógu sáttur með stöðu Hákonar Rafns Valdimarssonar hjá enska úrvalsdeildarliðinu Brentford, þar sem hann er kostur númer tvö í stöðu markvarðar.

Hákon er aðalmarkvörður íslenska landsliðsins og voru ummæli Hareide rædd í Íþróttavikunni.

„Hákon er 23 ára, varamarkvörður í risaklúbb. Hvað geturðu gert meira? Hann er að spila alla bikarleikina, var maður leiksins á móti Colchester. Ég er ekki hlutlaus því Hákon er einn af betri vinum mínum, en þetta er svo góður markmaður og hann hefur verið frábær með landsliðinu,“ sagði Jökull, sem var hissa á ummælum Hareide.

„Hann er að æfa með leikmönnum úr ensku úrvalsdeildinni. Þú ferð ekki mikið hærra en það,“ bætti hann við.

Það er mikið úrval af góðum íslenskum markvörðum þessa stundina og hrósaði Jökull til að mynda Elíasi Rafni Ólafssyni, markverði Midtjylland, sem er talinn kostur tvö á eftir Hákoni.

„Elli er með svo mikil gæði. Hann er stærsti maður á jörðinni en það er rosalegt hvernig hann getur hreyft sig. Svo er hann svo öruggur, sama hvort það eru háir boltar eða annað.“

Umræðan í heild er í spilaranum.