Alvaro Morata, leikmaður AC Milan, er bálreiður eftir ummæli borgarstjóra Corbetta á Ítalíu en hann opinberaði það að leikmaðurinn væri að flytja í bæinn.

Morata lék með Atletico Madrid á síðustu leiktíð en hann leitar að heimili á Ítalíu og taldi sig hafa fundið réttan stað.

Maður að nafni Marco Ballarini er borgarstjóri Corbetta en hann er harður stuðningsmaður Inter Milan sem eru erkifjendur AC Milan.

Morata óttast öryggi barna sinna eftir að flutningarnir voru opinberaðir og neyðist til þess að finna nýtt heimili fyrir sig og sína fjölskyldu.

,,Kæri borgarstjóri, takk fyrir að vanvirða mitt einkalíf. Sem betur fer þá er ekkert verðmætt á staðnum, það eina verðmæta sem ég á eru börnin mín,“ sagði Morata og bætir við: ,,Þeirra öryggi er í hættu vegna þín.“

,,Ég hélt að bærinn Corbetta gæti sýnt mínu einkalífi virðingu en þess í stað þá þarf ég að flytja sem fyrst þar sem þú ert óhæfur á samskiptamiðlum og í að vernda þína borgarbúa.“

Borgarstjórinn var ekki lengi að svara Morata en hann virðist sjálfur ekki sjá eftir sinni hegðun og svaraði Spánverjanum með stuttri færslu: ,,Bless!“