Tottenham fékk tækifæri á að selja Dele Alli fyrir meira en 80 milljónir punda á sínum tíma að sögn David Pleat sem starfaði sem njósnari félagsins og seinna yfirmaður knattspyrnumála.
Alli er í dag á mála hjá Everton og spilar engar mínútur en andleg vandamál og meiðsli hafa sett stórt strik í reikninginn.
Alli kom til Tottenham sem táningur árið 2015 og vakti strax athygli en hann var lengi vel mjög mikilvægur hlekkur í þeirra liði.
Pleat var fyrstur hjá Tottenham til að taka eftir Alli sem var ekki lengi að vekja heimsathygli eftir komuna.
,,Það er hægt að tala um Dele Alli. Ég fór með Franco Baldini að horfa á leik með honum – hann var í símanum allan tímann og fylgdist ekkert með,“ sagði Pleat.
,,Ég fékk um sex skýrslur um Dele á tveimur árum og þeir hefðu átt að hlusta á mig fyrr. Að lokum var mér sagt að hann væri á leið til Aston Villa eða Newcastle.“
,,Eftir kaupin þá hefðum við getað selt hann fyrir meira en 80 milljónir punda en svo fór allt eins og það fór.“
,,Ég er vonsvikinn og sár því ég horfði á hann þegar hann var 16 ára gamall og það var eitthvað einstakt við hann.“