UEFA hefur dæmt tvo dómara í langt bann en um er að ræða þá Bartosz Frankowski og Tomasz Musial sem koma frá Póllandi.
Frankowski og Musial voru handteknir nokkrum klukkutímum fyrir leik Rangers og Dynamo Kyiv sem fór fram í Lublin í Póllandi þann 6. ágúst.
Frankowski átti að vera einn af yfirdómurum VAR herbergirsins og þá var Musial hans aðstoðarmaður.
Stuttu fyrir verkefnið voru báðir aðilar handteknir fyrir það að reyna að stela götuskilti og var umsvifalaust vikið úr starfi.
Þeir voru báðir undir áhrifum áfengis og mega nú ekki dæma á vegum UEFA þar til 30. júní á næsta ári.
Frankowski var virtur dómari fyrir þetta atvik en hann hefur dæmt á bæði EM 2020 og EM 2024. Hann dæmdi í pólsku úrvalsdeildinni og Meistaradeildinni ásamt aðstoðarmanninum Musial.
Frankowski er fæddur árið 1986 en pólskir fjölmiðlar fjalla um það að hann sé mögulega búinn að dæma sinn síðasta keppnisleik á ferlinum.