Gary Neville hefur tjáð sig um sín verstu kaup á ævinni en þau komu stuttu eftir að hann lagði skóna á hilluna.

Neville átti mjög farsælan feril sem knattspyrnumaður Manchester United og enska landsliðsins en starfar í dag í sjónvarpi.

Þegar Neville var um 35 ára gamall þá ákvað hann að eyða gríðarlegri upphæð í rándýra Bentley bifreið sem hann hafði dreymt um í dágóðan tíma.

Neville áttaði sig fljótlega á því að það væri engin samleið á milli hans og bílsins sem var seldur aðeins þremur vikum seinna.

,,Ég sagði það alltaf á meðan ég var að spila að eftir að skórnir færu á hilluna þá vildi ég keyra um á risastórum fjögurra dyra Bentley bifreið,“ sagði Neville.

,,Ég vildi ekki svona lítinn Bentley, heldur þann stóra. Ég keypti einn þannig stuttu eftir að hafa hætt í fótbolta.“

,,Ég hugsaði með mér að ég væri kominn hingað og að ég mætti dekra aðeins við sjálfan mig, að ég ætti þetta skilið.“

,,Um leið og ég byrjaði að keyra um á bílnum þá áttaði ég mig á að það var ekki mikið til í þessu. Fólk byrjar að horfa í áttina að þér og ég hugsaði bara með mér að þetta væri ekki ég, ég var hægri bakvörður!“