Það eru ekki allir sem vita það að Jose Mourinho hafnaði boði Fenerbahce í sumar um að finna fyrir sig glæsihús í Tyrklandi.
Mourinho tók við knattspyrnuliði Fenerbahce í sumar en hann kemur til félagsins eftir dvöl hjá Roma.
Fenerbahce bauðst til að leigja risastórt einbýlishús fyrir Mourinho eftir komuna en Portúgalinn hafnaði því.
Mourinho vill einbeita sér algjörlega að fótboltanum og er enn þann dag í dag á hótelinu Four Seasons í Instanbul.
Um er að ræða glæsilegt hótel en Mourinho borgar tæplega 200 þúsund krónur fyrir hverja nótt í sínu herbergi.
Fjölmiðlar í Tyrklandi greina einnig frá því að Mourinho borði sömu máltíðina á hverju kvöldi en hann er reglulegur gestur á veitingastað hótelsins.
Mourinho er einn í Tyrklandi og án fjölskyldunnar en hvort hann kaupi sér hús á næstunni verður að koma í ljós.