Kolbeinn Birgir Finnsson bakvörður íslenska landsliðsins fékk mikinn stuðning frá leikmönnum landsliðsins eftir mjög erfitt föstudagskvöld. Kolbeinn var tekinn af velli í hálfleik í 2-2 jafntefli gegn Wales.

Kolbeinn gerði sig sekan um mistök í báðum mörkum Wales. Komið hefur fram að Hareide hafi eftir hálftíma leik tekið ákvörðun um að taka Kolbein af velli.

Hareide ræddi um frammistöðu Kolbeins á blaðamannafundi í gær en íslenska liðið á að mæta Tyrkjum á Laugardalsvelli í kvöld ef veður leyfir.

„Ég átti samtal við Kolbein um leikinn, við ræddum líka við allt liðið. Stundum koma svona leikir hjá leikmönnum, fótbolti er leikur mistaka. Allt lifandi fólk gerir mistök, á stærsta sviðinu gerir fólk líka mistök,“ sagði Hareide á fundinum.

Hareide trúir því og treystir að Kolbeinn sem leikur með Utrecht í Hollandi komi sterkari til baka. „Kolbeinn er góður leikmaður, hann mun koma til baka og læra af þessum leik.“

Hareide hrósaði svo eldri leikmönnum liðsins. „Leikmennirnir studdu við hann eftir leik á föstudag og ræddu við hann, hann veit að hann er ekki einn í þessu. Hann er með vini sína hér í hópnum sem styðja við hann.“