Ásta Eir Árnadóttir, fyrirliði Blika er liðið varð Íslandsmeistari á dögunum, var gestur Helga Fannars Sigurðssonar og Hrafnkels Freys Ágústssonar í nýjasta þætti af Íþróttavikunni á 433.is.

Sem fyrr segir lyfti Ásta titlinum á dögunum en tilkynnti svo í kjölfarið að skórnir væru komnir upp á hillu eftir farsælan feril í Kópavoginum.

„Þetta kom eiginlega bara upp fyrir tímabil. Þá fór ég svolítið að pæla og hugsa að þetta gæti orðið mitt síðasta tímabil. Svo leyfði ég því aðeins að malla, hélt því fyrir mig. Svo þegar hlutirnir fóru að þróast í þessa átt, að við gætum endað sem tvöfaldir meistarar eða allavega Íslandsmeistarar, þá fór ég bara að horfa á þetta þannig að ég ætlaði bara að klára þetta á þann hátt,“ sagði Ásta.

Hún tilkynnti þjálfarateyminu aðeins um hugleiðingar sínar þegar skammt var eftir af tímabilinu.

„Þau vita eiginlega aldrei að ég sé að hugsa þetta. Ég sagði þeim þetta bara fyrir svona þremur vikum, svo liðinu í kjölfarið. Þau voru aðeins búin að lesa í mig, þegar ég bað um að fá að tala við þau héldu ég að ég væri annað hvort ólétt eða að fara að hætta. En þau tóku þessu eins og höðfðingjar.“

Umræðan í heild er í spilaranum.