Jurgen Klopp var í dag ráðinn yfirþjálfari yfir öllum félögum sem Red Bull á, má þar nefna RB Leipzig, Red Bull Salzburg og New York Red Bulls.

Ljóst er að Klopp hefur alltaf hrifist af stefnu Red Bull og sanna gömul ummæli hans það.

Tíðindin koma nokkuð á óvart en Klopp sagði upp starfi sínu hjá Liverpool og ætlaði sér í frí. Hann ítrekar það í færslu sinni að hann ætli sér ekki að þjálfa strax.

Klopp hefur störf 1. janúar en þýskir miðlar segja að klásúla sé í samningi hans við Red Bull. Má hann taka við þýska landsliðinu ef slíkt tilboð kemur.

Tíðindin komu mörgum á óvart og falla í nokkuð grýttan jarðveg í Þýskalandi þar sem Red Bull er ekki hið hefðbundna fótboltafélag eins og Þjóðverjar vilja hafa þau.

Klopp hefur hins vegar rætt um Red Bull og starfsemi þeirra árið 2022.

„Það sem Red Bull er að gera er mjög spennandi, ég verð að segja það. Á hverju ári selja þeir góða leikmenn en geta alltaf búið til gott lið,“ sagði Klopp eftir æfingaleik við Red Bull Salzburg þegar hann stýrði Liverpool árið 2022.

„Það er mjög áhugavert hvað þeir eru að gera. Hugmyndafræði þeirra er ekki langt frá því sem við viljum gera.“