Tölvuleikjaframleiðandinn EA Sports hefur neyðst til að fela húðflúr vængmannsins Jadon Sancho sem spilar með Chelsea.
Frá þessu er greint í dag en Sancho er með mörg húðflúr á sínum líkama og hefur unnið að því listaverki í langan tíma.
EA Sports FC 25 verður gefinn út á næstunni en þónokkrir spilarar eru nú þegar byrjaðir að spila eftir að hafa keypt svokallaða ‘Ultimate’ tegund af leiknum.
EA Sports sýnir yfirleitt öll húðflúr stærstu leikmanna heims í góðum gæðum en hægri hönd Sancho mun líta öðruvísi út í leiknum.
Ástæðan er sú að Sancho er með myndir af karakterum eins og Homer Simpson, Sonic og Spider-Man á hægri handleggnum.
EA Sports er ekki með réttinn til að birta myndir af þessum karakterum og þurfa því að breyta útliti Sancho í tölvuleiknum vinsæla.
Englendingurinn gekk í raðir Chelsea í sumar frá Manchester United og hefur farið vel af stað með sínu nýja félagi.