Albert Brynjar Ingason er harður á sínu og fullyrðir hreinlega að Valur sé búið að opna samtalið við Rúnar Kristinsson þjálfara Fram um að taka við liðinu í haust.
Albert kom með þessar fréttir um liðna helgi en Framarar segja þær uppspuna en Albert er ekki sammála því.
„Það er smá titringur í gangi,“ segir Albert í hlaðvarpi sínu Gula spjaldið.
Hann segir málið eðlilega viðkvæmt enda séu fjórir leikir eftir af tímabilinu og Valur nýlega búið að ráða Srdjan Tufegdzic til starfa.
„Þetta er viðkvæmt núna, skiptir ekki máli hvort það sé eitthvað til í þessu eða ekki. Rúnar væri aldrei að fara að segja að hann væri í viðræðum við Val,“ segir Albert.
Hann segir menn í Fram hrædda um það að missa Rúnar úr starfinu.
„Ég hef þetta frá mjög áreiðanlegum heimildum, mér finnst hræðsla í Úlfarsárdal yfir þessu.“