KR-ingar bíða og vona að Reykjavíkurborg hefji framkvæmdir á svæði félagsins nú í haust og að gervigras verði lagt á aðalvöll félagsins. Aðstaðan sem KR hefur í dag er ekki merkileg.
Æfingavöllur liðsins sem er með gervigrasi er ónothæfur, grasið sem var lagt í fyrra er ónýtt.
Þá er grassvæði félagsins illa farið og líklega getur KR ekki klárað tímabilið á heimavelli í Bestu deild karla. „Ég labbaði inn á völlinn eftir leikinn og hann er bara búin að ljúka keppni, hann er ekkert eðlilega lélegur,“ sagði Elvar Geir Magnússon ritstjóri Fótbolta.net í hlaðvarpi miðilsins.
Elvar segir það sorglegt hvernig yfirvöld og Reykjavíkurborg hafa leyft svæðinu að verða verra með hverju árinu en Reykjavíkurborg á mannvirkið.
„Ég hef sagt það áður, bæði borg og stjórnvöld. Sigursælasta félag landsins og aðstaða þeirra er bara látin drabbast niður, í hvaða öðru landi myndi þetta gerast?.“
Hann segir alla umhirðu í kringum völlinn vonda og bendir á dæmi. „Ég fór á Meistaravelli um daginn á trépallinn sem er fjær, það er ennþá bara þessi heróín róluvöllur. Allur út í arfi og sprautum, þetta er rosalegt.“
„Þetta er hálf sorglegt,“ segir Elvar.
Guðmundur Aðalsteinn sem var með Elvari í hlaðvarpinu skellir skuldinni á Reykjavíkurborg. „Reykjavíkurborg og þau sem koma að þessu þurfa að skammast sín.“