Phil Jones fyrrum varnarmaður Manchester er í mjög áhugaverðu spjalli við High Performance hlaðvarpið. Jones er 32 ára gamall og hefur þuft að leggja skóna á hilluna.
Jones var öflugur framan af ferli sínum en meiðsli settu stórt strik í reikning hans og þurfti Jones að hætta fyrir um ári síðan.
Í hlaðvarpinu ræðir hann um atvik sem hann segir að það sé í eina skiptið á ferlinum sem hann hafi misst hausinn í klefanum.
Það gerðist árið 2022 þegar United tapaði 4-0 gegn Liverpool en Ralf Rangnick ákvað að taka Jones af velli í hálfleik.
„Ég hef aldrei misst hausinn í klefanum fyrir þetta atvik,“ segir Jones.
„Ég varð gjörsamlega brjálaður, ég trylltist. Hann niðurlægði mig, hann niðurlægði mig á Anfield. Erkifjendur okkar, stuðningsmenn okkar og fjölskylda.“
„Við vorum 2-0 undir hálfleik og vorum ekki góðir, við áttum ekki skot að marki í fyrri hálfleik. Ég hafði spilað ágætlega.“
Jones var ekki sáttur með þessa meðferð. „Ég hef horft aftur á þennan leik, ég gaf boltann aldrei frá mér og var rólegur undir pressu.“
„Ég er ekki að segja að ég hafi verið magnaður en ég átti ekki skilið að fara af velli í. hálfleik. Það voru leikmenn sem spiluðu miklu verr en ég, það var einfalt að taka mig af velli. Ég var blóraböggull.“
